人气偶像姜涛事业如日方中，不时透过社交网分享生活点滴嘅佢，日前（25日）亦趁着圣诞节同粉丝互动，并晒出七年前嘅旧照道：「七年前的圣诞，我还在做sales」。只见喺时装店更衣室前大玩自拍嘅姜涛，虽然一脸稚气，但青涩纯情气质同依家相差无几，文未更向粉丝挑战道：「就问你们敢不敢把七年前的放上来」。
事实上，入行前嘅姜涛做过6、7份工作，并曾喺商台节目透露：「因为我细个读书唔叻，我喺学校好曳，要见社工。」直言当时对学习零兴趣嘅佢，一度想退学，但就被社工鼓励继续读书：「佢建议我转去读其他学校，但嗰段时间冇学校肯收我，社工就经过一啲正规渠道，介绍我去做part-time，我15岁就开始part-time。」起初喺快餐店工作嘅佢，之后又喺咖啡店做侍应，再后来做埋售货员，并分享道最幸福嘅时光係喺食肆工作嘅日子，皆因搵到钱之余，仲可以有卖剩嘅免费麵包食，认真纯良又可爱。
随着年纪长大，姜涛亦开始思考：「自己个人生会唔会就係一直咁part-time落去？我觉得人哋讲乜嘢都冇用，係要你自己去谂，大道理係人都识嘅，但係要到你自己去到一个程度嘅时候，你自己就要识谂。」并喺16岁嘅时候忽然醒觉，决心减肥嘅同时，努力摸索自己嘅前路。
东网网站 : https://on.cc/东网Facebook专页 : https://www.facebook.com/onccnews/