马来西亚女神林明祯主演的电影前晚举行首映，原定会出席的她临时甩底，导演彭发大闹搞到他「一裤都係」十分麻烦，更分分钟连累赞助。明祯解释因护照问题而未能来港，但又神奇地被网民踢爆在首映场外出现，顿变大话「祯」！昨日她再度解释，因搵得番护照即赶来香港，似乎比电影剧情更奇幻！
导演彭发、艺人陈星妤与陈苡臻等前晚在尖沙咀出席电影《手机见鬼》首映，但该片女主角林明祯却临时甩底，令彭发大失预算，相当不满！他受访时被问明祯为何缺席，连珠爆发说：「听讲话个护照失咗蹤。（咁得意？）係呀！我都觉得得意呀！佢喺边我就唔知喇！总之就冇护照嚟唔到。（觉得好奇怪？）直头奇怪过拍鬼片啦！可能係护照见鬼啩！（明祯之后会唔会谢票？）我唔敢答你，佢今日都话嚟㗎！两、三个钟头前先话嚟唔到，依家我一裤都係，拍戏咁耐未试过。」提到明祯最近与MIRROR成员Edan传挞着，是否因挂住拍拖晕大浪而遗失护照？他说：「佢拍拖咩？咁我又冇问佢，唔会拍拖拍到护照都冇埋啩？係就真係好爱。」
女主角突然缺席，惟有靠首次拍戏的陈星妤大露背撑场，谈到打扮性感，她说：「因为天气咁啱唔係好冻。」对于明祯甩底，她说：「马来西亚宣传佢都喺度，好似因为有少少问题，所以返唔切嚟，可能仲有第二个地方首映，要等公布。（问吓佢返唔返嚟谢票？）都可以问吓，但有时有啲突发嘢冇办法避免。」
社交网道歉扑火
失场激嬲导演，明祯亦醒水地在社交网「跪低」，扬言护照有问题而未能登机，向记者、主办方、出品公司、赞助及商场负责团队致歉，但没有提彭发的名字；不过道歉不久，她又突然删去有关航班的字眼。原来当大队入晒戏院睇戏，临完场前，明祯在首映举行的商场外被野生捕获，更与Fans合照，即被网民插爆「大话妹」！
事件愈闹愈大，明祯再于社交网解画：「从台北準备飞港出席首映，但护照途中弄丢了，赶紧通知主办方们，真的超自责，庆幸护照还是找到了，也赶着最快航班并赶往戏院，庆幸还能见到来支持我的一班粉丝朋友！」
对于明祯的道歉声明，彭发说：「起码同工作人员、赞助商有交代，（佢冇嚟）真係好混乱同好多人受罪。」问到明祯突然又现身香港，他说：「係好神奇，之前话冇护照嚟唔到，但当有媒体访问完我，可能佢睇到出咗事或者导演唔高兴，又搵得番本护照，话会尽快嚟现场，佢亦好快嚟到香港尖沙咀，但因为大家入晒场，涉及太多人同活动安排，宣传公司同赞助商都唔想佢出现。」据知，本身首映场地获赞助全因明祯会出席，但她最终冇影，电影公司或要支付部分费用。至于明祯未受是非影响，昨晚被影到在澳门睇NBA名人赛。
更多新闻，请浏览东方日报网页：
https://orientaldaily.on.cc/
东网网站 : https://on.cc/东网Facebook专页 : https://www.facebook.com/onccnews/